Faglegur og líflegur vinnustaður

Í árslok 2023 var starfsfólk Rannís alls 70 í 66,5 stöðugildum að forstöðumanni meðtöldum. Starfsmönnum fjölgaði um fimm frá fyrra ári og stöðugildum um 3,9. Tólf starfsmenn voru ráðnir inn til Rannís bæði vegna aukins umfangs verkefna og eins vegna afleysinga starfsfólks í fæðingarorlofi, sjö á rannsókna- og nýsköpunarsvið, tveir á mennta- og menningarsvið, tveir á greiningar- og hugbúnaðarsvið og einn á rekstrarsvið. Alls hættu sjö starfsmenn á árinu og var ráðið í störf þeirra allra. Eitthvað var um breytingar á starfshlutfalli hjá starfsfólki.

Fjöldi starfsfólks á skrifstofu forstöðumanns, rekstrarsviði og á skrifstofu IASC hélst óbreyttur á milli ára. Í árslok 2023 voru fjórir starfsmenn á skrifstofu forstöðumanns að forstöðumanni meðtöldum. Á rekstrarsviði voru sjö starfsmenn í 6,55 stöðugildum og á skrifstofu IASC tveir starfsmenn í 1,75 stöðugildum. Breytingar urðu á starfsmannafjölda og stöðugildum á öðrum sviðum Rannís. Á rannsókna- og nýsköpunarsviði voru 26 starfsmenn í 24 stöðugildum og var það fjölgun um þrjá starfsmenn og 2,1 stöðugildi frá fyrra ári og á mennta- og menningarsviði voru 24 starfsmenn í 23,45 stöðugildum og var það fjölgun um 1,8 stöðugildi. Á greiningar- og hugbúnaðarsviði voru sjö starfsmenn í sjö stöðugildum í lok árs og var það fjölgun um 0,40 stöðugildi. Fjölgunin á þessum sviðum tengdist bæði auknum umsvifum og afleysingum í fæðingarorlofi þriggja starfsmanna.

Af 66,5 stöðugildum í árslok 2023 voru sérfræðingar í 57,6 stöðugildum, almennir starfsmenn í þremur stöðugildum, starfsmaður í tímavinnu í 0,60 stöðugildi, aðstoðarmaður í 0,30 stöðugildi, sviðsstjórar í fjórum stöðugildum eins og undanfarin ár og forstöðumaður í einu stöðugildi.

Meðalaldur starfsfólks í árslok 2023 var 48,27 ár. Flest starfsfólk eða 27,14% eru á aldursbilinu 51-60 ára, 25,72% er á aldrinum 31-40 ára, 21,42% eru á aldrinum 41-50 ára og aldrinum 61 árs og eldri, og 4,3% eru 30 ára og yngri.

Rannís leggur áherslu á að bjóða starfsfólki sínu fjölbreytta fræðslu með það að markmiði að auka skilvirkni og gæði starfsins, ásamt því að bæta í senn árangur og starfsánægju. Starfsfólk sótti fræðslu og námskeið í tengslum við starfsþróunaráætlun á árinu og í boði voru fjölbreytt námskeið á vegum stofnunarinnar. Á árinu var einkum lögð áhersla á rafræn námskeið og innanhúsnámskeið. Meðal námskeiða má nefna notkun á GoPro Foris þar sem kynnt var lagaumhverfi Rannís, verklag í skjalamálum, viðurkenndir vistunarstaðir, GoPro Foris málaskrá og lokun mála. Auk þess var starfsfólki boðið upp á einstaklingsfræðslu í skjalamálum sem margir nýttu sér. Einnig var boðið reglulega upp á kennslu á Teams, Sharepoint, OneDrive, kerfi í Orranum og aðgangsstýringarkerfið.

Nýliðafræðsla fyrir starfsfólk, sem hafði hafið störf nýlega hjá stofnuninni, var haldin eftir þörfum í upphafi starfs. Þar var farið yfir lykilatriði í starfsemi stofnunarinnar s.s. hlutverk og stefnur Rannís, starfsmannamál, Vinnustund, verkbókhald, umsóknarkerfi, vefinn, Outlook, GoPro skjalakerfi og Teams.

Alls voru haldnir fimm starfsmannafundir á árinu bæði í rafheimum og raunheimum og sex fréttafundir. Fréttafundir eru óformlegir morgunverðarfundir, en þar getur hver sem er kvatt sér hljóðs og sagt frá því sem er á döfinni og á erindi til annars starfsfólks.

Heilsudagar

Heilsudagar voru haldnir dagana 22.-25. maí en Rannís leggur áherslu á að skapa góðan vinnustað þar sem starfsfólki líður vel og eru árlegir heilsudagar liður í því.

Á heilsudögum héldu Hulda Tölgyes sálfræðingur og Þorsteinn V. Einarsson kynjafræðingur fyrirlestur um þriðju vaktina; um hugrænu byrðina sem fylgir hinni ólaunuðu ábyrgð, yfirumsjón og verkstýringu á heimilis- og fjölskylduhaldi. María Margeirsdóttir hjá Jógasetrinu leiddi starfsfólk í gegnum nærandi jógaæfingar og nidra slökun og HAFÍS, sjósundfélag starfsfólks Rannís, bauð samstarfsfólki í sjósundtíma í Nauthólsvík. Starfsfólki var einnig boðið að taka þátt í gönguhópi, morgunleikfimi og opnum tíma hjá badminton-hópi Rannís. Til að toppa stemninguna voru töfraðir fram heilsudrykkir á morgnana og einnig var heilsuþema í mötuneytinu í hádeginu.

Alls var varið tæplega 684 klst. í námsleyfi starfsfólks. Einn starfsmaður sótti um og fékk formlegt leyfi til að leggja stund á háskólanám í allt að 15 vikur. Einn starfsmaður fékk auk þess styrk til norrænna starfsmannaskipta og dvaldi í tvo mánuði hjá Norrænu ráðherranefndinni í Danmörku.

Í árslok 2022 var auglýst eftir sérfræðingum í nýsköpunarteymi og alþjóðateymi á rannsókna- og nýsköpunarsviði og hófu í kjölfarið þrír sérfræðingar störf í byrjun árs 2023 og einn á vormánuðum. Í upphafi árs var einnig auglýst eftir skjalastjóra á rekstrarsviði sem hóf störf í byrjun mars. Fjórir sumarstarfsmenn voru ráðnir tímabundið til Rannís en einn þeirra hefur auk þess verið í hlutastarfi með námi. Á haustmánuðum var bætt við sérfræðingi í nýsköpunarteymi rannsókna- og nýsköpunarsviðs, í æskulýðsteymi mennta- og menningarsviðs og tveimur hugbúnaðarsérfræðingum á greiningar- og hugbúnaðarsvið. Einnig var um nokkrar tímabundnar ráðningar að ræða vegna afleysinga starfsfólks í fæðingarorlofi og aukins umfangs verkefna.

Starfsfólk Rannís hjá IASC

•  Gerlis Fugmann 
• Kolbrún Reynisdóttir 
• Federica Scarpa, samkvæmt samkomulagi við Norðurslóðanet .