Viðburðir af ýmsu tagi skipa stóran sess í starfsemi Rannís. Er þeim ætlað að styðja við kynningarstarf á verkefnum og sjóðum sem Rannís hefur umsjón með og gera áhrif þekkingarsköpunar sýnileg. Rannís á einnig þátt í að hvetja vísinda- og fræðafólk til dáða með viðurkenningum af ýmsu tagi. 

Nýsköpunarverðlaun forseta Íslands eru veitt árlega þeim námsmönnum sem hafa unnið framúrskarandi starf við úrlausn verkefnis sem styrkt var af Nýsköpunarsjóði námsmanna sumarið áður. Verðlaunin voru fyrst veitt 1996 og voru því nú veitt í tuttugasta og sjötta sinn.  

Ari Kvaran, Sunneva Sól Ívarsdóttir og Þórdís Rögn Jónsdóttir, nemar í iðnaðarverkfræði við Háskóla Íslands og Ísól Sigurðardóttur, nemi í tölvunarfræði við Háskólann í Reykjavík hlutu verðlaunin árið 2021 fyrir verkefnið Betri samskipti við sjúklinga sem bíða innlagnar og meðferðar á sjúkrahúsinu Vogi. Leiðbeinendur voru Guðmundur Valur Oddsson, Rögnvaldur Jóhann Sæmundsson og Tómas Philip Rúnarsson, prófessorar á verkfræði- og náttúruvísindasviði Háskóla Íslands og Valgerður Árný Rúnarsdóttir, yfirlæknir á sjúkrahúsinu Vogi.  

Forseti Íslands, Guðni Th. Jóhannesson, afhenti verðlaunin sem í ár voru tvenns konar: Annars vegar Herring bone ullarteppi frá fyrirtækinu Alrúnu og hins vegar Living Objects stjakar eða vasar frá fyrirtækinu Fólk Reykjavík, hannaðir af Ólínu Rögnudóttur en þeir eru gerðir úr íslenskum steini, gabbró og blágrýti.  

Stjórn sjóðsins valdi sex öndvegisverkefni en aðeins eitt þeirra hlaut svo viðurkenninguna.   

Verkefnin sem tilnefnd voru sem öndvegisverkefni eiga það sameiginlegt að vera vel unnin og frumleg en eru afar ólík innbyrðis og sýna vel þá fjölbreytni sem einkennir verkefni sem sjóðurinn veitir styrki til. Verkefnin fimm sem  voru einnig tilnefnd til verðlaunanna og hlutu sérstaka viðurkenningu:  

Aukið aðgengi að hugrænni atferlismeðferð (HAM): Hugmynd að borðspili 

Hreinsun skólps með himnum á Íslandi 

Óróasjáin “Tremv” - Ný forritseining fyrir jarðskjálftakerfið SeisComP 

Sálfræðileg einkenni íslenskra knattspyrnuiðkenda: Kynning og fræðsla 

Nýsköpunarverðlaunforseta Íslands voru afhent við hátíðlega athöfn á Bessastöðum þann 20. janúar 2021.

Ný tækifæri í Evrópusamstarfi voru kynnt í beinni útsendingu frá Borgarleikhúsinu 15. apríl þegar nýrri kynslóð samstarfsáætlana ESB í umsjón Rannís var hleypt af stokkunum. Um er að ræða Erasmus+, Horizon Europe, European Solidarity Corps og Creative Europe.

Við þetta tilefni leiddi Bergur Ebbi Benediktsson samtal milli stjórnenda áætlananna fjögurra hjá Rannís og gesta með reynslu af þeim, um mikilvægi þátttökunnar fyrir íslenskt samfélag og sóknarfæri á nýju tímabili. Lilja Dögg Alfreðsdóttir, mennta- og menningarmálaráðherra, flutti opnunarávarp og lokaorð flutti LucieSamcová-Hall Allen, sendiherra ESB á Íslandi. Einnig voru frumsýnd myndbönd sem vörpuðu ljósi á árangursrík verkefni frá fyrra tímabili. Alls horfðu um 1.000 manns á útsendinguna.

Opnunarhátíðin var í beinni útsendingu frá Borgarleikhúsinu 15. apríl þegar nýrri kynslóð samstarfsáætlana ESB var hleypt af stokkunum. 

Þann 24. júní var haldinn vorfundur Tækniþróunarsjóðs fyrir gesti og í streymi. Yfirskrift fundarins var Tækni og skapandi greinar og mikilvægi samspils þar á milli.

Þórdís Kolbrún R. Gylfadóttir ferðamála-, iðnaðar- og nýsköpunarráðherra opnaði fundinn. Gestafyrirlesari var Sigurlína Ingvarsdóttir frumkvöðull. Í kjölfar fundar voru pallborðsumræður með Halldóri Eldjárn tölvunarfræðingi og listamanni, Agli Egilssyni hönnuði, Möggu Dóru viðmótshönnuði og Ástu Olgu Magnúsdóttur verkefnisstjóra hjá Gagarín. Þau eiga það öll sameiginlegt að vinna samtímis með tækni og sköpun, hvert á sinn hátt.

Vorfundur Tækniþróunarsjóðs var haldinn 24. júní fyrir gesti og í streymi. 

Fyrirtækið 1939 Games var valið Vaxtarsproti ársins sem er viðurkenning fyrir öfluga uppbyggingu sprotafyrirtækis. Þetta var í fimmtánda skiptið sem viðurkenningin er veitt, en tilgangur hennar er að vekja athygli á góðum árangri sprotafyrirtækja í örum vexti og skapa þannig aukinn áhuga og skilning á uppbyggingarstarfi þessara fyrirtækja.  Utanríkisráðherra, Guðlaugur Þór Þórðarson, afhenti viðurkenninguna.

Vaxtarsprotinn er viðurkenning sem veitt er á vegum Samtaka iðnaðarins, Rannís og Háskólans í Reykjavík. 

Vaxtarsprotinn var afhentur þann 2. september í Flórunni í Grasagarðinum, Laugardal.

Hvatningarverðlaun Vísinda- og tækniráðs voru afhent við hátíðlega athöfn á Rannsóknaþingi Rannís. Dr. Erna Sif Arnardóttir, lektor við verkfræði- og tölvunarfræðideildir Háskólans í Reykjavík og Dr. Martin Ingi Sigurðsson, prófessor í svæfinga- og gjörgæslulækningum við Háskóla Íslands og yfirlæknir á sama sviði við Landspítala hlutu viðurkenninguna að þessu sinni. Katrín Jakobsdóttir, forsætisráðherra og formaður Vísinda- og tækniráðs, afhenti verðlaunin.

Verðlaunin eru veitt vísindafólki sem þykir hafa hafa skarað framúr snemma á ferlinum og skapað væntingar um framlag í vísindastarfi er treysti stoðir mannlífs á Íslandi.

Hvatningarverðlaun Vísinda- og tækniráðs 

Hvatningarverðlaun Vísinda- og tækniráðs voru afhent á Rannsóknaþingi Rannís þann 9. september 2021.

Rannís skipuleggur árlega Rannsóknaþing í samstarfi við Vísinda- og tækniráð þar sem tekin eru fyrir stefnumál á sviði rannsókna og nýsköpunar.  Í ár var yfirskrift þingsins Árangur í rannsóknum og nýsköpun til framtíðar og var það haldið fimmtudaginn 9. september í beinni útsendindingu á netinu frá Grand Hótel Reykjavík. 

Á árinu 2020 gekk Vísinda- og tækniráð frá nýrri vísinda- og tæknistefnu 2020-2022, sem var til umfjöllunar. Í stefnunni er lögð áhersla á hlutverk öflugra samkeppnissjóða, en meginsjóðirnir hafa eflst verulega á árunum 2020 og 2021, auk þess sem stuðningur við rannsóknir innan fyrirtækja hefur stóreflst. Þar kemur einnig fram sýn ráðsins til ársins 2030, að Ísland sé samfélag þar sem rannsóknir, hugvit, sköpun og frumkvæði leiða til umbóta, verðmætasköpunar og öflugs athafna- og menningarlífs. Hugarfar, fjármagn, umgjörð og mannauður styðji við vísindi og nýsköpun sem grundvöll velsældar. 

Lilja Alfreðsdóttir, mennta- og menningarmálaráðherra setti þingið. Katrín Jakobsdóttir forsætisráðherra og formaður Vísinda- og tækniráðs og Ragnhildur Helgadóttir ávörpuðu þingið og fjölluðu um nýja stefnu Vísinda- og tækniráðs og árangur í rannsóknum og nýsköpun til framtíðar. 

Rannsóknaþing var haldið þann 9. september í beinni útsendindingu á netinu frá Grand Hótel Reykjavík. 

Vísindavaka var ekki haldin með einum stórum viðburði eins og síðustu ár og kom það til vegna aðstæðna. Þess í stað var gefið út sérblað tileinkað vísindum og vísindamiðlun með Fréttablaðinu 24. september. 

Í blaðinu var að finna viðtöl við fólk í vísindum. Umfjöllunarefni voru margvísleg, allt frá nýtingu jarðvarma til matvælaframleiðslu í hringrásarkerfum til hljóðfæra með gervigreind og fjölmiðla, Facebook og „falsfrétta“ á Íslandi. 

Vísindakaffi  
Þrátt fyrir heimsfaraldur var hægt að halda hið sívinsæla Vísindakaffi og voru þrjú þeirra í Reykjavík, eitt var haldið í Bolungarvík og annað í Hólmavík. Markmiðið með Vísindakaffi Rannís er að vísindafólk segi frá rannsóknum sínum á óformlegan hátt. Gestir fá tækifæri til að taka þátt í kaffihússpjalli um rannsóknir og spyrja vísindafólk spjörunum úr. 

Fyrsta Vísindakaffið var í Perlunni í Reykjavík 20. september og var yfirskriftin Loftslagsógnin! Hvaða tæknilausnir eru í farvatninu.  Þar kynnti Sigurður Reynir Gíslason, jarðefnafræðingur og vísindamaður við Háskóla Íslands, hvernig Carbfix aðferðin kom til, en hún fangar koltvíoxíð úr útblæstri orku- og iðjuvera sem hluta af því að ná markmiðum Parísarsamkomulagsins. Annað Vísindakaffið tengdist yfirstandandi heimsfaraldri, en þar fjallaði Ingileif Jónsdóttir, prófessor við læknadeild Háskóla Íslands og deildarstjóri hjá Íslenskri erfðagreiningu, um þýðingu bólusetninga á tímum heimsfaraldurs, þróun bóluefna og vernd gegn Covid-19. Þriðja og síðasta Vísindakaffið í Reykjavík var um falsfréttir og upplýsingaóreiðu á samfélagsmiðlum og þá sérstaklega litið til stöðunnar á Íslandi. Jón Gunnar Ólafsson nýdoktor við stjórnmálafræðideild Háskóla Íslands rýndi í niðurstöður, útskýrði hugtökin og tók dæmi um upplýsingar um Covid-19 og falsfréttir í kosningabaráttunni sem þá stóð sem hæst.  

Á vísindakaffinu í Bolungarvík var yfirskriftin Stóriðja í Jökulfjörðum. Hvalveiðistöðvar Norðmanna og þróun sjávarútvegs fram á miðja 20. öld. Dr. Ragnar Edvardsson, sérfræðingur við Rannsóknasetur HÍ á Vestfjörðum fjallaði um rannsóknir sínar á hvalveiðistöðvum Norðmanna á Vestfjörðum. 

Vísindakaffið á Hólmavík var tileinkað afmæli Þjóðfræðistofu og voru fjögur viðamestu verkefni sem þar er unnið að kynnt. Þau eru Menningararfur í ljósmyndum, Dagbækur fyrri alda, Fortíð og framtíð Hólmavíkur og Þjóðtrúarfléttan. 

Viðurkenning fyrir framúrskarandi vísindamiðlun 

Afhending viðurkenningar fyrir vísindamiðlun var í beinni útsendingu frá Nauthóli föstudaginn 24. september. Lilja Alfreðsdóttir mennta- og menningarmálaráðherra afhenti viðurkenninguna en að þessu sinni hlutu tveir aðilar hana; Veðurstofa Íslands fyrir miðlun upplýsinga um hvers kyns náttúruvá og Sævar Helgi Bragason, sem hefur miðlað vísindum til almennings á fjölbreyttan hátt, með sérstakri áherslu á að ná til barna og ungmenna. Athöfnin var fyrir boðsgesti og í streymi, og fyrir afhendingu flutti Annette Klinkert forstöðukona EUSEA - The European Science Engagement Association erindi um vísindamiðlun undir heitinu: Face the Challenge - Make a Difference. Science communication and Public engagement.  

Vísindavaka og viðurkenning fyrir vísindamiðlun

Vísindavaka var haldin í lok september 2021 og í tengslum við hana var afhent viðurkenning fyrir vísindamiðlun.

Þann 9. desember fór haustúthlutun Tækniþróunarsjóðs fram í Grósku og í streymi.

Um var að ræða uppskeruhátíð þar sem haustúthlutuninni var fagnað og nýir styrkþegar boðnir velkomnir til samstarfs við sjóðinn. Ávarp flutti Áslaug Arna Sigurbjörnsdóttir, ráðherra háskóla, iðnaðar og nýsköpunar. Fulltrúar tveggja fyrirtækja sem hlutu styrk kynntu verkefnin, Finnur Pind frá Treble og Sigurður Halldórsson frá Pure North Recycling. 

Uppskeruhátíðin fór fram þann 9. desember í Grósku og í streymi.

Viðburðir skipa stóran sess

Nýsköpunarverðlaun forseta Íslands

Opnunarhátíð samstarfsáætlana ESB

Vorfundur Tækniþróunarsjóðs

Vaxtarsprotinn

Hvatningarverðlaun Vísinda- og tækniráðs

Rannsóknaþing

Vísindavaka og viðurkenning fyrir vísindamiðlun

Uppskeruhátíð Tækniþróunarsjóðs