Miðlun upplýsinga 

Vefur Rannís er grunnstoðin í samskiptamálum stofnunarinnar. Á vefnum er hægt að nálgast upplýsingar um starfsemi Rannís, auglýsingar um umsóknarfresti, úthlutunarfréttir, viðburði og kynningar og allar upplýsingar um sjóði í umsýslu Rannís.

Á árinu var áfram unnið að uppsetningu á nýju vefsvæði Rannís undir island.is. Í lok júní hófst birting frétta og viðburða á nýrri stofnanasíðu Rannís (island.is/s/rannis) samhliða birtingu þeirra á rannis.is. Í nóvember 2025 var birtingu frétta og viðburða hætt á þáverandi vefsvæði Rannís og síðan þá hefur slíkt efni eingöngu verið birt á nýjum vef. Fram til ársloka var unnið hörðum höndum að því að koma efni sjóða og áætlana yfir á nýtt vefsvæði og tengja við Styrkjatorg og stofnanasíðu Rannís. Áætlað var að flutningur á léninu rannis.is og skyldra léna yrði lokið um áramótin en ferlinu var seinkað fram yfir áramót.

Á nýju vefsvæði Rannís eiga notendur sem fyrr að geta nálgast allar upplýsingar um starfsemi stofnunarinnar og þá þjónustu sem hún veitir. Áhersla er lögð á að leit sé skilvirk og að notendur fái hraða og örugga þjónustu. Helsta breytingin er nýtt Styrkjatorg island.is sem smíðað var fyrir vefsvæðið með umfang sjóða og áætlana Rannís í huga en er þó aðgengilegt öðrum stofnunum og aðilum innan island.is sem bjóða upp á styrki. Styrkjatorg sækir upplýsingar um opnun og lokun innlendra sjóða beint í hugbúnaðarkerfi Rannís sem býður upp á aukna sjálfvirkni í upplýsingagjöf á vefnum.

Vefsvæði Rannís er uppfært daglega og á forsíðu eru reglulega settar inn nýjar fréttir og upplýsingar um verkefni, sjóði og auglýsingar um umsóknarfresti. Með flutningi Rannís undir hatt island.is nýtast stefnur Stafræns Íslands á sviði aðgengismála, efnisbirtingar og tungumála öðrum þáttum stofnunarinnar eins og best verður á kosið. Þá má nefna að flutningur Rannís yfir á island.is hefur einnig stuðlað að þróun vefsvæðisins island.is , t.d. með tilkomu viðburðadagatals sem allar stofnanir undir island.is geta nýtt sér

Rannís heldur einnig utan um nokkur vefsvæði er tengjast sérverkefnum í umsjón stofnunarinnar.

Farabara.is er vefur sem veitir upplýsingar um námsmöguleika erlendis. Vefurinn fékk tæplega 12.500 heimsóknir á árinu frá tæplega 10.600 notendum.

Landskrifstofa Erasmus+ heldur úti sérvefsvæði fyrir Erasmus+ áætlunina en þar eru veittar upplýsingar um áætlunina og verkefni tengd henni (þar á meðal European Solidarity Corps).Erasmus+ vefurinn var heimsóttur tæplega 49.000 sinnum á árinu af rúmlega 32.000 gestum. Alls var flett í gegnum rúmlega 95.300 síður á vef Erasmus+.

Á vefsvæði Vísindavöku er hægt að nálgast allar upplýsingar um viðburði sem tengjast Vísindavöku á Íslandi. Heimasíða Vísindavöku fékk tæplega 4.000 heimsóknir á árinu.

Rannís heldur einnig utan um Eurodesk síðuna sem veitir ungu fólki upplýsingar um ýmis tækifæri sem því býðst á erlendri grundu. Enn fremur þjónustar starfsfólk Rannís íslenskan hluta fjölmargra alþjóðlegra vefsvæða er tengjast fjölmörgum verkefnum í umsýslu Rannís.

Hlutverk upplýsingastofunnar er að veita leiðbeinandi ráðgjöf til þeirra sem hyggjast fara í nám erlendis og aðstoða fólk í gegnum síma, tölvupóst og fjarfundi. Upplýsingastofan heldur úti vefnum FaraBara.is en heimsóknir á vefinn voru 18.374 árið 2025 sem er mikil aukning frá árinu áður.

Upplýsingastofan tók einnig þátt í kynningum í menntaskólum og háskólum ásamt Eurodesk og æskulýðsteymi landskrifstofu Erasmus+. Náðu þessar kynningar til fleiri en 1.200 ungmenna vítt og breitt um landið. Upplýsingastofan heldur áfram að vera í góðu samstarfi við SÍNE (Samtök íslenskra námsmanna erlendis) en margar af reynslusögum nemenda eru t.d. birtar í samvinnu við SÍNE á vefnum FaraBara.is. Á aðventunni halda FaraBara.is og SÍNE sameiginlegan viðburð þar sem áhugasömu ungu fólki gefst færi á að ræða við íslenska nema í námi erlendis og spyrjast fyrir um góð ráð.

Vefurinn Study in Iceland er yfirfarinn af starfsfólki upplýsingastofunnar en það er Íslandsstofa sem heldur vefnum úti. Einstaka sinnum berast þangað fyrirspurnir um nám á Íslandi sem starfsfólk upplýsingastofunnar svarar einnig.

Kynningar

Framhaldsskólar og háskólar hafa verið aðalmarkhópar kynningastarfs á tækifærum fyrir ungt fólk á aldrinum 13–30 ára. Rúmlega 25 kynningar voru haldnar víðs vegar um landið til að miðla upplýsingum um tækifæri í námi erlendis, skiptinámi, sjálfboðaliðastörfum, ungmennaskiptum og öðru sem stendur ungu fólki til boða í gegnum áætlanir og stoðverkefni Rannís. Kynningarnar náðu til rúmlega 1.200 manns. Samfélagsmiðlar hafa verið vel nýttir til að miðla þessum tækifærum og var aukinn kraftur lagður í samfélagsmiðla Erasmus+ og Eurodesk á Íslandi. Það er einmitt starfsfólk landskrifstofunnar og Eurodesk sem hefur annast þessar kynningar ásamt starfsfólki upplýsingastofu um nám erlendis. Instagram-vef Eurodesk Iceland er ætlað að höfða til ungs fólks en áhorf á ýmiss konar efni voru 73.500 árið 2025.

Samfélagsmiðlar eru nýttir til að auka sýnileika, koma skilaboðum á framfæri, opna fyrir samskipti og styðja virkni heimasíðunnar.

Stefna Rannís um viðveru og miðlun á samfélagsmiðlum er í reglulegri endurskoðun í takti við þróun flóru samfélagsmiðla.

Facebook: Rannís heldur úti nokkrum Facebook-síðum. Á Rannís síðunni er fréttum af vef Rannís deilt og sagt frá helstu viðburðum á vegum stofnunarinnar. Einnig halda nokkur verkefni, sem eru í umsýslu Rannís, úti sérsíðum, t.d. Erasmus+, Tækniþróunarsjóður, Europass, Epale Ísland, Creative Europe Desk á Íslandi, Vísindavaka, eTwinning á Íslandi og Eurodesk Ísland.

LinkedIn: Rannís er með LinkedIn síðu og deilir þar fréttum af vef Rannís og helstu viðburðum á vegum stofnunarinnar. Einnig eru Tækniþróunarsjóður og Enterprise Europe Network með sérsíður á LinkedIn.

X: Rannís er með X (Twitter)-aðgang sem hefur verið óvirkur á árinu.
Nokkur verkefni í umsjón Rannís hafa einnig eigin X (Twitter) reikninga, t.d. Erasmus+ menntun, Creative Europe, eTwinning, Nýsköpunarsjóður námsmanna, IASC, Tækniþróunarsjóður og Epale Ísland. Mjög hefur dregið úr notkun á samfélagsmiðlinum og meiri áhersla hefur verið lögð á að ná til markhópa á öðrum samfélagsmiðlum.

Instagram: Rannís er með aðgang á Instagram og hefur þeim sem fylgjast með Rannís á Instagram fjölgað jafnt og þétt á árinu. Önnur verkefni í umsjón Rannís sem einnig hafa eigin Instagram aðganga eru: Eurodesk Ísland, Erasmus+, Vísindavaka og Europass.

TikTok: Á árinu opnaði Erasmus+ svo aðgang á TikTok þar sem tækifærum Erasmus+ og stoðverkefna áætlunarinnar er miðlað áfram á skemmtilegan hátt en með birtingu efnis á TikTok er stefnt að því að miðla upplýsingum og fróðleiks til ungs fólks á Íslandi.

Rannís og Landskrifstofa Erasmus+ halda úti sitthvorri YouTube-rásinni þar sem birt eru ýmis myndbönd sem veita innsýn í bæði styrki og áætlanir, sem Rannís hefur umsjón með, auk myndbanda um árangursrík verkefni sem hlotið hafa stuðning úr sjóðum eða frá erlendum styrktaráætlunum.

Dæmi um myndbönd sem gerð voru á árinu og birt á YouTube:

• Ofbeldisforvarnarskólinn - Evrópusamstarf í stafrænum heimi
• Þekkingarnet Þingeyinga - Evrópusamstarf í stafrænum heimi
• Verzlunarskólinn - Evrópusamstarf í stafrænum heimi
• eTwinning 20 ára - Evrópusamstarf í stafrænum heimi

Á YouTube má einnig finna upptökur úr streymi ýmissa viðburða sem bæði Rannís og landskrifstofa Erasmus+ stóðu fyrir á síðasta ári.

Reglulega eru sendar út tilkynningar á póstlista Rannís. Þau sem skráð eru á póstlistann fá fyrst og fremst áminningar um áhugaverða viðburði en einnig upplýsingar um umsóknarfresti fram undan sem og auglýsingar um tilnefningar til verðlauna og fleira.

Hægt er að skrá sig á póstlistann á vefsíðu Rannís og voru áskrifendur á árinu tæplega 2.800 talsins.
Við skráningu á póstlistann er hægt að velja milli sjö ólíkra markhópa eftir áhugasviðum áskrifenda.

Auðvelt er að afskrá sig af póstlistanum og uppfæra upplýsingar til samræmis við persónuverndarlög.

Skráning á póstlista Rannís

Starfsemi Rannís var sem fyrr vel sýnileg í fjölmiðlum á árinu. Alls var fjallað um Rannís í 595 umfjöllunum sem er um 30% fækkun á milli ára. Fækkunin skýrist að miklu leyti af umfjöllun og sýnileika Evrópurútunnar árið 2024 en í tengslum við hana var röð viðburða haldin um allt land. Af þessum 595 umfjöllunum voru rúmlega 460 birtar á netmiðlum, 120 í prentmiðlum og sjö í sjónvarpi/útvarpi.

Það sem helst vekur athygli fjölmiðla eru stórar úthlutanir til ákveðinna verkefna, svo sem úthlutun Listamannalauna, úthlutun úr Tækniþróunarsjóði og Rannsóknasjóði. Að sama skapi beinast sjónir fjölmiðla að framúrskarandi verkefnum sem hlotið hafa styrki úr sjóðum sem heyra undir Rannís. Einnig vakti veiting viðurkenninga, eins og Nýsköpunarverðlauna Íslands og Nýsköpunarverðlauna forseta Íslands, athygli.

Prentað kynningarefni innlendra sjóða og erlendra áætlana var unnið eftir þörfum og lagt upp með að kynningarefni væri tímalaust og því nothæft til lengri tíma. Haldið var áfram með prentun á spjöld í nafnspjaldastærð fyrir einstaka sjóði og áætlanir. Þá var unnið að endurnýjun stærra kynningarefnis á borð við gardínustanda. Eldri gardínustandar voru þá endurnýttir og nýjar gardínur prentaðar og settar í eldri standa.

Birtingar á auglýsingum í prentmiðlum voru þó nokkrar en þar var athygli vakin á umsóknarfrestum. Í því samhengi má nefna birtingar í Morgunblaðinu, Bændablaðinu og Heimildinni.