Mennta- og menningarsvið

Á mennta- og menningarsviði störfuðu að jafnaði 23 einstaklingar á árinu. Starfsemi sviðsins skiptist í þrjú teymi, eitt teymi innlendra sjóða sem heldur utan um 12 innlenda sjóði á sviði menntunar, menningar, æskulýðsmála og íþrótta og tvö alþjóðateymi. Annað alþjóðateymið er Erasmus+ teymið, sem rekur Landskrifstofu Erasmus+ og European Solidarity Corps, og hitt er teymi Nordplus og stoðverkefna. Það sér um rekstur Landskrifstofu Nordplus og heldur utan um fjölda stefnumótandi stuðningsverkefna sem tengjast ýmist Erasmus+ eða almennri stefnumótun. Rekstur upplýsingaveitna um nám er mikilvægur hluti starfsemi sviðsins. Þar er vefsíðan farabara.is þekktust en hún veitir afar yfirgripsmiklar upplýsingar um nám erlendis. Ekki voru miklar breytingar á starfsmannahópi mennta- og menningarsviðs á árinu, nema helst í æskulýðsteyminu, auk þess sem ráðinn var sérfræðingur á sviðið með aðsetur á Akureyri. Standa vonir til að sú ráðning muni verða til þess að bæta enn frekar samstarf, sýnileika og kynningarstarf Rannís á landsbyggðinni.

Árið einkenndist af aukinni sókn í alla sjóði og áætlanir á mennta- og menningarsviði, bæði innlenda sjóði og evrópska, jafnt sem norrænar samstarfsáætlanir. Greina má stigvaxandi áhuga á alþjóðlegu samstarfi. Fjöldi umsókna í Erasmus+ og European Solidarity Corps fór fram úr björtustu vonum auk þess sem umsóknir í allar undiráætlanir Nordplus voru fleiri en nokkru sinni áður.

Menningargeirinn á Íslandi landaði fjölmörgum styrkjum úr Creative Europe og var árangur okkar á sviði menningar, kvikmynda- og sjónvarpsþáttagerðar með eindæmum góður á árinu. Fjöldi umsókna í þá 12 innlendu sjóði sem sviðið hefur umsjón með jókst einnig mikið og ánægjulegt er að fylgjast með sköpunarkraftinum sem býr í mennta-, æskulýðs- og menningargeiranum á landinu.

Kynningarstarf á mennta- og menningarsviði var öflugt sem fyrr, viðburðir af ýmsu tagi voru fyrirferðarmiklir í starfi sviðsins og margir alþjóðlegir vinnuhópar og gestir sóttu okkur heim. Sérstök áhersla var lögð á að halda kynningarfundi á landsbyggðinni til að fylgja eftir velgengni Evrópurútunnar sem fór hringferð um landið árið áður í tilefni af 30 ára afmæli EES-samningsins, þegar Rannís heimsótti bæi í öllum landshlutum og kynnti tækifæri og styrki sem í boði eru í evrópsku samstarfi.

Á árinu voru rúmar 16 milljónir evra til úthlutunar úr Erasmus+ og European Solidarity Corps og hafði starfsfólk Landskrifstofunnar í nógu að snúast við að afgreiða umsóknir og styðja umsækjendur og verkefnastjóra þeirra verkefna sem voru í vinnslu. Ákveðin tímamót voru í evrópskum áætlunum, eins og Erasmus+, þar sem fyrstu línur voru lagðar að næstu kynslóð áætlana í kjölfar miðmats sem fór fram í öllum þátttökulöndum árið áður. Það verður spennandi að fylgjast með nýjum áætlunum þróast á næstu mánuðum og árum.

Í tengslum við Evrópuár um stafræna borgaravitund var árleg ráðstefna Erasmus+ haldin á Evrópudeginum 9. maí undir yfirskriftinni Evrópusamstarf í stafrænum heimi – Fræðsla til framtíðar. Þar var sjónum beint að því hvernig formlegt og óformlegt nám getur hjálpað fólki að taka virkan þátt í stafrænu samfélagi

Menningar- og kvikmyndageirinn sótti töluvert í Creative Europe og á árinu fengu íslenskir þátttakendur tæplega 2 milljónir evra í styrki. Sem fyrr var mest sótt í MEDIA hluta áætlunarinnar sem skilaði sér í miklum fjölda styrkja til íslenskrar kvikmynda- og sjónvarpsþáttagerðar. Á árinu varð líka vöxtur í menningarhluta Creative Europe. Það verður spennandi að fylgjast með þeirri þróun en mikil samkeppni er um menningarsamstarf í Evrópu.

Teymi innlendra sjóða á mennta- og menningarsviði hélt áfram vinnu við að straumlínulaga vinnulag og ferla í umsýslu sjóðanna og lögð var áhersla á að bæta þjónustu við viðskiptavini með því að samræma notkun umsókna- og umsýslukerfis Rannís. Breyting varð á samstarfi við fagráðuneyti í tengslum við tilfærslu málaflokka í kjölfar kosninga og skiptast innlendir sjóðir á málefnasviðum sviðsins nú milli tveggja fagráðuneyta.

Aldrei hafa fleiri umsóknir borist til Nordplus en Rannís hefur umsjón með undiráætlun Nordplus um norræn tungumál sem Landskrifstofa áætlunarinnar á Íslandi. Fjöldi umsókna jókst mikið í aðalumsóknarfresti áætlunarinnar eða um 12% milli ára í allar undiráætlanirnar fimm.

Af öðrum verkefnum er helst að telja að metfjöldi umsókna barst í UK-Iceland Explorer Fund þegar úthlutað var úr sjóðnum í fjórða sinn. Um er að ræða tvíhliða samstarf Íslands og Bretlands þar sem íslenskir nemar geta sótt um styrk til framhaldsnáms eða starfsþjálfunar í Bretlandi.

Starf mennta- og menningarsviðs hefur gengið mjög vel á árinu, jafnt í evrópskum og norrænum samstarfsáætlunum sem og í innlendum sjóðum. Góður árangur, samheldni og gott andrúmsloft einkenndi starf sviðsins en það er ekki síst frábæru starfsfólki sviðsins að þakka sem með dugnaði og skilvirkni er alltaf til í að koma með nýjar hugmyndir og leggja til bætt verklag, bæði í alþjóðastarfi jafnt sem umsýslu innlendra sjóða. Ánægjulegt er að fylgjast með grósku og krafti í samstarfinu og fram undan eru spennandi tímar við að kynna tækifæri og samstarf á sviði menntamála, menningar, æskulýðsmála og íþrótta.