Greiningar- og hugbúnaðarsvið

Hlutverk sviðsins er að þróa, reka og halda utan um umsókna-, mats- og umsýslukerfi Rannís. Auk þess sér það um utanumhald og framsetningu tölfræðilegra gagna sem unnin eru úr umsóknum og úthlutunum. Sviðið ber einnig ábyrgð á þróun annarra kerfa sem styðja störf sjóðsstjóra Rannís og starfsfólks stofnunarinnar.

Auknum umsvifum Rannís og auknum kröfum samfélagsins hefur verið mætt með markvissri áherslu á upplýsingatækni. Í dag eru allar umsóknir rafrænar. Fagráðs- og matsvinna fer fram í stafrænni vinnuumgjörð og öll umsýsla sjóðsstjóra og stjórna fer fram rafrænt. Sérstök áhersla er lögð á að öll samskipti umsækjenda við Rannís fari í gegnum „Mínar síður“ Rannís. Stefnt er að því að öll helstu samskipti umsóknar, frá stofnun hennar til loka samnings með tilheyrandi skýrslugerð, verði aðgengileg þar.

Umsókna-, fagráðs- og upplýsingakerfi Rannís gegna lykilhlutverki í starfsemi innlendra sjóða sem Rannís hefur umsjón með.

• Umsóknakerfi taka við öllum umsóknum og tengdum gögnum.
• Fagráðs- og matskerfi halda utan um vinnu matsmanna sem allir eru utan stofnunarinnar.
• Samninga- og skýrslukerfi halda utan um innlenda samninga og skýrslur. Í sumum sjóðum eru ekki gerðir formlegir samningar, heldur undirritaðir skilmálar með rafrænum undirskriftum.
• Greiðslukerfi heldur utan um þær greiðslur sem Rannís sér um og tengjast samningum og skýrslum. Hægt verður að sjá stöðu allra undirritaðra samninga og hvernig greiðslur standa, t.d. í tengslum við skýrsluskil.
• Gagnatorg Rannís veitir stjórnvöldum og almenningi aðgang að gögnum um styrki og tölfræði tengdri starfsemi sjóða í umsjón Rannís.

Notendur þessara kerfa skipta þúsundum. Á árinu 2025 var heildarfjöldi umsókna um sjö þúsund og fimm hundruð. Auk umsækjenda notuðu yfir þúsund matsmenn og stjórnarmenn, bæði innlendir og erlendir, kerfin í störfum sínum.

Endurforritun umsóknakerfa sjóða telst almennt vera lokið í bili. Að sjálfsögðu er þó viðbótum og lagfæringum aldrei lokið; kerfi Rannís þurfa þróast í takt við kröfur samtímans. Á árinu voru umsókna-, fagráðs- og skýrslukerfi fyrir Netöryggissjóð ítruð auk margra annarra kerfa Rannís.

Samningakerfi Rannís
Á árinu hélt þróun samningakerfa Rannís áfram. Nýtt samningakerfi fyrir Netöryggisstyrk var tekið í notkun. Áframhaldandi þróun var á samningakerfum fyrir Rannsóknasjóð og Tækniþróunarsjóð sem eru meðal flóknustu samninga sem Rannís vinnur með.
Samningakerfin stuðla að auknu gagnaöryggi, draga úr hættu á mannlegum mistökum og einfalda vinnuferla, bæði fyrir styrkþega og starfsfólk Rannís. Kerfið styður við rafrænar undirritanir í samstarfi við Taktikal.

Skýrslukerfi
Unnið var ötullega að þróun skýrslukerfa fyrir fleiri sjóði. Nokkur uppfærð kerfi voru tekin í notkun, bæði á Rannsókna- og nýsköpunarsviði og Mennta- og menningarsviði Rannís.

Gagnatorg
Á úthlutanasíðu Gagnatorgs er hægt að nálgast opinberar upplýsingar um úthlutanir frá sjóðum í umsjón Rannís allt frá árinu 1988. Í stefnu Rannís til 2025 er lögð áhersla á að efla upplýsingakerfi stofnunarinnar og vera í fremstu röð á því sviði. Gagnatorgið leikur lykilhlutverk í þessari þróun því það tryggir aðgang allra að opinberum upplýsingum um styrki og rannsóknarfjármögnun í gegnum tíðina.

Leigukerfi
Fleiri sjóðir bættust við á árinu í leigukerfum Rannís. Leigukerfin eru einvörðungu fyrir sjóði sem ekki er í umsýslu Rannís. Þessi nýja viðbót er leigukerfi fyrir Byggðastofnun og Landshlutasamtökin, í raun eitt stórt kerfi sem er með sjö mismunandi framendum og flækjustigið eftir því. Kerfin eru aðgengileg í gegnum Mínar síður Rannís og eru sérsniðin að þörfum viðkomandi sjóðs þar sem starfsfólk sjóðanna sér alfarið um þjónustu og samskipti við umsækjendur og styrkþega. Þessi lausn er hluti af þróun Rannís til að styðja við fleiri stofnanir ríkisins með notkun hugbúnaðarlausna stofnunarinnar.

Greiðslukerfi

Þróun og notkun greiðslukerfis Rannís hélt áfram á árinu. Með þessu kerfi fæst heildaryfirsýn yfir stöðu umsókna frá því að umsóknir hljóta styrk og þar til seinasta greiðsla er greidd sem getur jafnvel verið eftir mörg ár. Kerfið tryggir auðvelt aðgengi að gögnum, meira gagnsæi, kemur í veg fyrir villur í gagnainnslætti og flýtir fyrir útborgun styrkja.

Í lok árs störfuðu sjö einstaklingar á Greiningar- og hugbúnaðarsviði: Sviðsstjóri og sex sérfræðingar í hugbúnaðargerð. Auk þess hefur sviðið aðgang að tæknilegum ráðgjafa sem hefur veitt ráðgjöf í bæði hugbúnaðarþróun og greiningarvinnu sviðsins.

Einn helsti styrkleiki teymisins er hæfni þess til að vinna að fjölbreyttum verkefnum á skilvirkan hátt og laga sig að breyttum aðstæðum. Verkefni sviðsins ná yfir allt frá hugbúnaðarþróun til gagna- og greiningarvinnu, og það er von okkar að hægt verði að viðhalda þessum öfluga hópi til að styðja starfsemi Rannís áfram með frekari þróun gagna- og upplýsingakerfa.

Á næstu árum verður áfram unnið að samþættingu og þróun kerfa Rannís með það að markmiði að bæta þjónustu og stuðning við starfsemi stofnunarinnar. Auk samþættingar er markmið næsta árs að fara í svolitla upplyftingu á viðmótum kerfanna og auka enn bæði læsileika og aðgengi þeirra. Næstu ár verða spennandi og við vonumst til að geta stutt starfsemi Rannís enn frekar með nýjum og öflugri lausnum í rafrænni umsýslu.