Sjóðir og úthlutanir

Barnamenningarsjóður Íslands var stofnaður í tilefni aldarafmælis fullveldis Íslands árið 2018. Árið 2023 samþykkti Alþingi aðgerðaáætlun um eflingu barnamenningar fyrir árin 2024–2028 þar sem sjóðurinn var festur í sessi.

Hlutverk sjóðsins er að fjármagna og styðja fjölbreytta starfsemi á sviði barnamenningar með áherslu á sköpun, listir og virka þátttöku barna í menningarlífi. Í starfi sjóðsins er m.a. horft til áherslu menningarstefnu um samstarf stofnana, skóla, félagasamtaka og einstaklinga, ásamt því markmiði að jafna aðgengi barna og ungmenna að fjölbreyttum og vönduðum listviðburðum óháð búsetu og efnahag.

Umsóknarfrestur var til 4. apríl 2025. Alls bárust 138 umsóknir og var sótt um 448,8 m.kr. 47 verkefni voru styrkt og heildarupphæð úthlutunarinnar var 100,2 m.kr. Á degi barnsins 25. maí var tilkynnt um úthlutun við hátíðlega athöfn. Logi Einarsson, menningar-, nýsköpunar- og háskólaráðherra, ávarpaði verkefnisstjóra af þessu tilefni og Skólahljómsveit Austurbæjar, skipuð grunnskólabörnum, lék nokkur lög.

Hæstu styrkina fengu þrjár barnamenningarhátíðir á landsbyggðinni, 5,5 milljónir hver, Barnamenningarhátíðin Þræðir á Austurlandi, Púkinn, Hafið og Sólmyrkvinn á Vestfjörðum og Barnamenningarhátíð Vesturlands 2025.

Hlutverk Bókasafnasjóðs er að efla starfsemi bókasafna. Sjóðurinn styrkir skilgreindar rannsóknir og þróunar- og samstarfsverkefni á sviði bókasafna og upplýsingamála. Sjóðnum er einnig heimilt að styrkja önnur verkefni til að efla faglegt samstarf bókasafna, m.a. alþjóðleg samstarfsverkefni með þátttöku bókasafna sem falla undir lögin.

Umsóknarfrestur í Bókasafnasjóð var 17. mars 2025. Sjóðnum bárust 25 umsóknir og sótt var um 73,6 m.kr. en 19 m.kr. voru til úthlutunar. Styrkjum var úthlutað til 11 verkefna. Borgarbókasafn Reykjavíkur fékk hæsta styrkinn, eða 4,5 m.kr., fyrir verkefnið „Læsi á stöðu og baráttu kvenna“. Næsthæsta styrkinn, 3,5 m.kr., fékk Norræna húsið fyrir verkefnið „Lína, lýðræðið og lestrarævintýrið“. Logi Einarsson, menningar-, nýsköpunar- og háskólaráðherra, tilkynnti úthlutunina 25. maí 2025.

Hlutverk Innviðasjóðs er að byggja upp rannsóknarinnviði á Íslandi. Markmiðið með sjóðnum er að efla innlendar vísindarannsóknir og skapa nýja möguleika til rannsókna með fjármögnun tækjabúnaðar og/eða aðstöðu sem ekki er fyrir hendi.

Umsóknarfrestur fyrir styrkárið 2025 var 31. október 2024. Innviðasjóður bauð upp á fimm tegundir styrkja: Vegna verkefna tengdum vegvísi, tækjakaupastyrk, uppbyggingarstyrk, uppfærslu- og viðhaldsstyrk og aðgengisstyrk.

Framlag ríkisins til sjóðsins var 427,2 m.kr. á fjárlögum.

Alls bárust 33 umsóknir í Innviðasjóð, þar af 30 sem stóðust formkröfur og voru metnar í fagráði. Alls hlutu 12 verkefni styrki eða 40% umsókna. Sótt var um 1.780 m.kr. og voru 430 m.kr. veittar eða 24% umbeðinnar upphæðar.

Um 88% úthlutaðs fjármagns var veitt til vegvísaverkefna en alls bárust 13 umsóknir vegna verkefna tengdum vegvísi og hlutu átta þeirra styrk.

Markmið styrkjanna er að gefa öllum sem búsettir eru hér á landi og skráðir eru með lögheimili í Þjóðskrá, tækifæri á að öðlast nauðsynlega færni í íslensku til að þeir geti orðið virkir samfélagsþegnar á Íslandi.

Styrkir til íslenskukennslu fyrir útlendinga eru veittir einu sinni á ári skv. reglugerð sem samþykkt var í árslok 2015 og fer sú úthlutun fram í upphafi árs.

Úthlutun 2025: Umsóknarfrestur var 5. desember 2024.

Alls barst 21 umsókn frá fyrirtækjum og stofnunum til þessara verkefna. Umsótt upphæð var 682,3 m.kr. og fékk 21 verkefni styrk. Ráðuneytið hækkaði upphæð til úthlutunar um rúmlega 33 m.kr. frá fyrra ári og úthlutaði alls 294,3 m.kr. til íslenskukennslu á árinu. Samtals fengu fyrirtæki og stofnanir styrki til þess að halda 858 námskeið fyrir 10.028 nemendur á árinu 2025 sem er aukning um 64 námskeið og 696 nemendur á milli ára.

Úthlutun var tilkynnt 14. febrúar 2025.

Úthlutun 2026: Umsóknarfrestur var 8. desember 2025.

Alls bárust 19 umsóknir frá fyrirtækjum og stofnunum til þessara verkefna. Umsótt upphæð var 678,3 m.kr. og mun úthlutun fara fram í lok janúar 2026.

Hlutverk sjóðsins er að stuðla að nýsköpun og eflingu íþróttastarfs fyrir börn og unglinga, efla þekkingu þjálfara og leiðbeinenda í íþróttastarf, auka gildi íþróttastarfs í forvörnum og auka veg og virðingu íþróttastarfs í samfélaginu.

Á fjárlögum 2025 voru rúmlega 22 m.kr. til ráðstöfunar úr Íþróttasjóði. Auk þess gat sjóðurinn úthlutað fjármunum vegna eldri styrkja sem höfðu ekki verið nýttir. Aðeins var einn umsóknarfrestur og bárust 136 umsóknir að upphæð 315 m.kr. Að tillögu íþróttanefndar ákvað mennta- og barnamálaráðherra að úthluta styrkjum til 76 verkefna að upphæð 32 m.kr. Þar af fengu 42 verkefni styrk til að bæta aðstöðu til íþróttaiðkana fyrir 13,3 m.kr., 26 fræðslu- og útbreiðsluverkefni fengu styrk upp á 9,8 m.kr. og átta verkefni vegna rannsókna í íþróttafræðum upp á 8,9 m.kr. Lágmarksstyrkur til verkefna úr Íþróttasjóði er 250 þúsund kr. Meðalstyrkur var um 560.000 kr. sem er aðeins hærri en undanfarin ár.

Hlutverk Jafnréttissjóðs Íslands er að styrkja verkefni og rannsóknir sem miða að því að efla jafnrétti kynjanna í íslensku samfélagi og á alþjóðavísu. Sjóðurinn var stofnaður í tilefni af 100 ára afmæli kosningaréttar íslenskra kvenna árið 2015.

Auglýst er eftir umsóknum annað hvert ár. Í ár var auglýst eftir umsóknum 27. febrúar með umsóknarfresti til 10. apríl. Alls bárust 69 gildar umsóknir. Sótt var um 358 m.kr. Um 51 m.kr. var úthlutað í styrki til tíu verkefna sem er um 14% árangurshlutfall miðað við innsendar umsóknir. Dómsmálaráðherra, Þorbjörg Sigríður Gunnlaugsdóttir, kynnti úthlutun úr sjóðnum við formlega athöfn í Hannesarholti 19. júní.

Listamannalaun 2025

Umsóknarfrestur vegna listamannalauna 2025 var 1. október 2024.

Alls voru 1.720 lögbundin mánaðarlaun til úthlutunar. Mánuðum fjölgaði milli ára vegna breytingar á lögum og tveggja nýrra launasjóða, launasjóði kvikmyndahöfunda og Vegsemd, sem er fyrir listamenn, 67 ára og eldri.

Fjöldi umsækjenda var 1.339 (1.223 einstaklingar og 116 sviðslistahópar). Sótt var um 11.988 mánuði. Úthlutun fengu 251 listamaður og 12 sviðslistahópar.

Úthlutun var tilkynnt 5. desember 2024.

Upphæð listamannalauna árið 2025 var 560.000 kr. á mánuði.

_________________________________________________________________________

Listamannalaun – 2026 (úthlutað í desember 2025)

Umsóknarfrestur vegna listamannalauna 2026 var 1. október 2025.

Alls voru 1.970 lögbundin mánaðarlaun til úthlutunar. Mánuðum til úthlutunar fjölgaði á milli ára í öllum sjóðum samkvæmt breytingum á lögum um listamannalaun frá 2024.

Fjöldi umsækjenda var 1.156 (1.031 einstaklingur og 125 sviðslistahópar). Sótt var um 10.719 mánuði, þar af 1.755 mánuði frá sviðslistahópum. Úthlutun fengu 306 listamenn. Við það bættist úthlutun til þátttakenda í sviðslistahópum úr launasjóði sviðslistafólks sem tengist Sviðslistasjóði.

Úthlutun var tilkynnt 1. desember 2025.

Upphæð listamannalauna árið 2026 eru 580.000 kr. á mánuði.

Loftslagssjóður var sameinaður Orkusjóði í umsjá Orkustofnunar árið 2024 með breytingum á lögum nr. 76/2020 um Orkusjóð.

Rannís heldur utan um tölfræði úthlutana frá fyrri árum en með sameiningunni fluttist umsýsla sjóðsins frá Rannís til sameinaðrar Umhverfis- og orkustofnunar.

Markáætlun í tungu og tækni

Hlutverk markáætlunar er að stuðla að nýtingu nýrrar samskiptatækni í íslensku samfélagi til hagsbóta fyrir almenning, stofnanir og fyrirtæki. Áherslur áætlunarinnar eru ákvarðaðar af Vísinda- og nýsköpunarráði en hún er fjármögnuð af háskóla-, iðnaðar- og nýsköpunarráðuneyti

Auglýst var eftir umsóknum í Markáætlun í tungu og tækni 21. febrúar með umsóknarfresti til 10. apríl. Markáætlun í tungu og tækni styrkir verkefni í máltækni sem hafa það að markmiði að gera íslensku gjaldgenga í stafrænni upplýsingatækni og auðvelda notkun hennar á þeim vettvangi

Alls bárust 25 umsóknir. Úthlutað var 636 m.kr. til 12 verkefna sem er um 48% árangurshlutfall miðað við innsendar umsóknir. Verkefnin eru ýmist til eins árs, tveggja eða þriggja ára.

Markáætlun um náttúruvá

Hlutverk markáætlunar um náttúruvá er að undirbúa land og þjóð betur fyrir atburði sem tengjast náttúruhamförum og öfgum náttúruafla, ásamt því að bregðast við þeim á skipulegan hátt. Markáætluninni er ætlað að styðja við nýsköpunarmiðað þekkingarsamfélag, sem nýtir öflugar grunnrannsóknir og hagnýta þekkingu til að takast á við áskoranir sem tengjast náttúruvá og miðla þekkingu til almennings og stjórnvalda.

Auglýst var eftir umsóknum í Markáætlun um náttúruvá 12. september með umsóknarfresti til 6. nóvember sem var svo framlengdur til 13. nóvember. Úthlutun til verkefna er áætluð á vormánuðum 2026.

Hlutverk menntarannsóknasjóðs er að styrkja stoðir hagnýtra menntarannsókna á sviði leikskóla, grunnskóla, framhaldsskóla og frístundastarfs sem byggja á samstarfi rannsakenda og fagfólks í skóla- og frístundastarfi, auka tækifæri til að skapa og miðla þekkingu til framþróunar og farsældar í skólastarfi og styðja framkvæmd menntastefnu.

Auglýst var eftir umsóknum í október en umsóknarfrestur var 21. nóvember. Var fresturinn framlengdur til 26. nóvember. Bárust 15 umsóknir í sjóðinn. Sótt var um rúmar 385 m.kr. en til úthlutunar voru rúmar 148 m.kr. Veittar voru tæpar 148 m.kr. til fimm verkefna eða um 33% umsókna.

Hlutverk námsorlofs er að veita þeim sem um það sækja tækifæri til að efla þekkingu sína og hæfni í starfi.

Umsóknarfrestur var 7. október 2025

Alls bárust 95 umsóknir um námsorlof kennara og stjórnenda framhaldsskóla á árinu en umsóknirnar gilda fyrir veturinn 2026–2027. Sóttu 82 framhaldsskólakennarar um orlof í eigin nafni en 13 umsóknir bárust frá skólum fyrir hönd kennara.

Nefndin úthlutaði alls 41 stöðugildi til 43 einstaklinga, 39 heilum orlofum og fjórum hálfum; 32,5 stöðugildi fóru til kennara með einstaklingsumsóknir og 8,5 var úthlutað til kennara í gegnum skólaumsóknir. 33 konur fengu námsorlof að þessu sinni og tíu karlar. Meðalaldur orlofsþega var 55 ár og meðalstarfsaldur þeirra var 22,5 ár.

Úthlutunin var tilkynnt 12. desember 2025.

Nýsköpunarsjóður námsmanna er samstarfsverkefni menningar-, nýsköpunar- og háskólaráðuneytisins og Reykjavíkurborgar. Markmið sjóðsins er að gefa háskólum, rannsóknastofnunum og fyrirtækjum tækifæri til að ráða námsmenn í grunnnámi og námi á meistarastigi við háskóla í sumarvinnu að rannsókna- og þróunarverkefnum. Alls bárust 293 umsóknir fyrir 444 háskólanema. Sjóðurinn úthlutaði um 140 m.kr. sem samsvarar 1.301 mannmánuði til 139 nemenda í 94 verkefnum.

Hlutverk sjóðsins er að veita styrki til eflingar rannsókna á korta- og landfræðisögu Íslands og íslenskri bókfræði og stuðla að útgáfu rita um þau efni.

Auglýst er eftir umsóknum í sjóðinn annað hvert ár. Auglýst var eftir umsóknum í febrúar 2025 með umsóknarfresti til 5. maí. Alls bárust sjö umsóknir í sjóðinn, styrkjum var úthlutað til allra sjö verkefnanna eða 100% innsendra umsókna. Úthlutað var 3,8 m.kr. í styrki.

Hlutverk Rannsóknasjóðs er að styrkja vísindarannsóknir og rannsóknartengt framhaldsnám á Íslandi. Í þeim tilgangi styrkir sjóðurinn nemendur í rannsóknartengdu framhaldsnámi og skilgreind rannsóknarverkefni einstaklinga, rannsóknarhópa, háskóla, rannsóknastofnana og fyrirtækja.

Rannsóknasjóður er opinn samkeppnissjóður sem veitir styrki samkvæmt almennum áherslum ráðherranefndar um vísindi og nýsköpun og á grundvelli faglegs mats á gæðum rannsóknarverkefna, færni þeirra einstaklinga sem stunda rannsóknirnar og aðstöðu þeirra til að sinna verkefninu. Sjóðurinn starfar samkvæmt lögum um opinberan stuðning við vísindarannsóknir nr. 3 frá 2003 með áorðnum breytingum.

Rannsóknasjóður bauð upp á fimm tegundir styrkja: Öndvegisstyrki, verkefnisstyrki, nýliðunarstyrki, nýdoktorsstyrki og doktorsnemastyrki. Umsóknir voru metnar í sjö fagráðum.

Framlag ríkisins til Rannsóknasjóðs á fjárlögum var 3.072,6. Alls bárust 381 gild umsókn í Rannsóknasjóð og hlutu 64 verkefni styrk eða 16,8% umsókna. Sótt var um 7.033 m.kr. og voru 1.114 m.kr. veittar eða 15,8% umbeðinnar upphæðar. Þessar tölur endurspegla styrkupphæð á fyrsta ári styrktra verkefna.

Heildarskuldbinding til næstu þriggja ára er tæplega 3.072,6 m.kr.

Alls bárust 27 umsóknir um öndvegisstyrki og tvö verkefni hlutu styrki; árangurshlutfall var 7,4%. Umsóknir um verkefnisstyrki voru 171 og voru 29 verkefni styrkt; árangurshlutfall var 17,0%. Umsóknir um nýdoktorsstyrki voru 58 og tíu styrkir voru veittir; árangurshlutfall var 17,2%. Umsóknir um doktorsnemastyrki voru 125 og hlutu 23 doktorsnemar styrki; árangurshlutfall var 18,4%.

Hlutverk SEF er að tryggja framboð endurmenntunar fyrir framhaldsskólakennara.
Boðið var upp á tvær tegundir umsókna til Samstarfsnefndar um endurmenntun framhaldsskólakennara á árinu, annars vegar fyrir sumarnámskeið og hins vegar fyrir gestafyrirlesara- og ráðstefnustyrki.

Umsóknarfrestur var 17. febrúar 2025.

Sótt var um styrki fyrir 25 sumarnámskeið á árinu og fengu allir umsækjendur úthlutun. Úthlutuð upphæð fyrir sumarnámskeið var rúmlega 24,5 m.kr. en að loknum uppgjörum var upphæðin, sem var nýtt, rúmlega 20 m.kr.

Umsóknarfrestur fyrir gestafyrirlesara- og ráðstefnustyrki var 7. október 2025.

40 styrkumsóknir bárust vegna gestafyrirlesara og ráðstefna og voru 38 þeirra samþykktar. 29 umsóknir bárust frá faggreinafélögum og 11 frá framhaldsskólum. Alls var 25 styrkjum úthlutað vegna ráðstefna og 13 vegna gestafyrirlesara fyrir samtals 16 m.kr.

Á árinu 2016 var frádráttarheimild fyrir erlenda sérfræðinga, sem eru ráðnir til starfa hér á landi vegna sérþekkingar sinnar og reynslu, lögfest. Markmið laganna er að auðvelda fyrirtækjum að fá til sín sérfræðinga til að ekki þurfi að fara með viðkomandi starfsemi úr landi. Skilyrði er meðal annars að viðkomandi búi yfir þekkingu eða reynslu sem ekki er fyrir hendi hér á landi, eða einungis í litlum mæli.

Rannís rekur umsóknakerfi fyrir nefnd sem afgreiðir umsóknirnar og tilkynnir ríkisskattstjóra niðurstöðuna. Alls bárust 296 umsóknir sem voru afgreiddar á 15 fundum nefndarinnar árið 2025. Ætla má að um 2/3 umsókna séu tengdir rannsóknum, þróun og nýsköpun og um 1/3 öðrum sérhæfðum verkefnum, þar með talið kennslu.

Samþykktar umsóknir voru 250, eða 84%, og 47, eða 16%, var hafnað. Alls sóttu starfsmenn um 90 vinnuveitenda um skattaafslátt. Starfsmenn fyrirtækja, sem sóttu um, voru 208, eða 70%, starfsmenn stofnana voru 57, eða 19%, og starfsmenn háskóla voru 30, eða 10%, en tvær umsóknir flokkast utan þessara hópa. Ætla má að 60 íslenskir einstaklingar njóti skattfríðinda eftir heimkomu á árinu 2025, eftir a.m.k. fimm ár erlendis. Starfsmenn, sem lögðu inn umsókn, voru af 56 mismunandi þjóðernum. Um 22% umsækjenda er með doktorspróf, 41% með masterspróf og 25% með bakkalárpróf.

Stærsta stuðningsaðgerð stjórnvalda til að efla rannsókna- og þróunarstarf nýsköpunarfyrirtækja á Íslandi ber nafnið „Skattfrádráttur rannsókna- og þróunarverkefna“. Stuðningurinn fer fram í tengslum við skattkerfið í formi endurgreiðslna af hluta kostnaðar við rannsókna- og þróunarverkefni sem hlotið hafa staðfestingu Rannís á undangengnu ári.

Rannís er skv. lögum falið það hlutverk að staðfesta að viðkomandi rannsókna- og þróunarverkefni uppfylli kröfur laganna ásamt tilheyrandi reglugerð nr. 758/2011. Þrír sérfræðingar hafa komið að þessu verkefni hjá Rannís á undanförnum árum en tölvudeild Rannís hefur í samráði við þessa sérfræðinga komið á öflugu umsókna- og umsýslukerfi til móttöku og afgreiðslu umsókna, með innbyggðri vöktun á því að regluverkinu sé fylgt eftir með skilvirkum hætti.

Úrvinnsla umsókna

Á árinu 2025 bárust 528 umsóknir um skattfrádrátt rannsókna- og þróunarverkefna til Rannís sem er um 13,9% fækkun frá árinu á undan. Fækkun umsókna, sem hófst á árinu 2024, hélt því áfram árið 2025.

Til samanburðar bárust 664 umsóknir árið 2023 og 613 árið 2024 sem fól í sér 7,7% fækkun milli ára. Umsóknir 2025 eru færri en Covid-árið 2020. Afgreiðslu umsókna ársins 2024 var að mestu lokið í þriðja ársfjórðungi 2025 og þá höfðu 256 af 313 framhaldsumsóknum verið staðfestar eða um 82%, og af 300 nýjum umsóknum ársins 2024 höfðu 115 verið staðfestar eða 38%. Í heild var staðfestingarhlutfall umsókna ársins 2024 því um 61%. Í ársbyrjun 2026 höfðu umsækjendur um 70 umsókna ársins 2025 fengið fyrstu svör en engar höfðu verið staðfestar.

Eins og lesa má úr framangreindri töflu varð umtalsvert stökk í fjölgun umsókna á tímabilinu 2020 –2023 vegna hvatningaráhrifa bráðabirgðalaga sem Alþingi samþykkti í maí 2020. Þessi hvatningaráhrif hafa farið dvínandi á árunum 2024 og 2025 með lægra staðfestingarhlutfalli sem m.a felur í sér að mörg verkefni sem komu inn sem ný á árinu 2020 eru komin í innleiðingar-, markaðs- og viðhaldsstöðu og uppfylla þannig ekki lengur skilyrði laganna.

Í fjárlögum ársins 2025 var áætlað að endurgreiðsla þess árs vegna staðfestra verkefna ársins 2024 yrði nálægt 17,2 milljörðum króna en reyndist við álagningu lögaðila í nóvember um 13,3 milljarðar króna. Endanleg tala getur þó enn tekið breytingum. Lítil og meðalstór fyrirtæki hafa að meðaltali fengið um 78% árlegrar endurgreiðslu frá árinu 2020.

Sprotasjóður er sameiginlegur sjóður fyrir leik-, grunn- og framhaldsskóla sem styður þróun og nýjungar í skólastarfi.

Áherslur sjóðsins árið 2025 voru eftirtaldar:

• Leikurinn sem leið til náms
• Gervigreind
• Grunnþáttur menntunar - Læsi

Umsóknarfrestur í Sprotasjóð var 30. janúar 2025.

Samtals barst sjóðnum 61 umsókn að undangenginni birtingu auglýsingar. Samanlagðar fjárbeiðnir námu alls 204,4 m.kr. Styrkjum að upphæð 80,8 m.kr. var úthlutað til 30 skólaþróunarverkefna fyrir skólaárið 2025–2026 og voru styrkir afhentir við hátíðlega athöfn í mennta- og barnamálaráðuneytinu.

Úthlutun var tilkynnt 12. júní 2025.

Hlutverk sjóðsins er að launa starfsemi þeirra fræðimanna sem starfa sjálfstætt í sinni fræðigrein. Sjóðurinn styrkir eingöngu ritun fræðirita og -greina, handbóka, orðabóka og viðamikils upplýsingaefnis á íslensku í ýmsu formi, einn opinberra sjóða á Íslandi.

Auglýst var eftir umsóknum í febrúar og var umsóknarfrestur 17. mars 2025. Alls bárust 44 gildar umsóknir og var sótt um starfslaun til 360 mánaða eða um 202 m.kr. Veittar voru rúmar 45 m.kr. til 18 fræðimanna eða um 41% umsækjenda.

Markmið stuðningsins er að efla útgáfu bóka á íslensku með því að veita bókaútgefendum tímabundinn stuðning í formi endurgreiðslu á hluta kostnaðar sem fellur til við útgáfu bóka á íslensku. Bókaútgefendur hafa níu mánuði frá útgáfu bókar til að senda inn umsókn.

Stuðningur við útgáfu bóka á íslensku hefur verið í gildi frá 1. Janúar 2019 samkvæmt lögum sem samþykkt voru í árslok 2018. Með lagasetningu sér ríkissjóður um að taka að sér að endurgreiða 25% af endurgreiðsluhæfum kostnaði sem fellur til vegna útgáfu bóka á íslensku.

Endurgreiðsla ársins 2025 nam um 429 m.kr. Voru 769 umsóknir greiddar út, þar af 66 frá árinu áður.

Hlutverk Sviðslistasjóðs að efla sviðslistir og búa þeim hagstæð skilyrði.

Umsóknarfrestur í Sviðslistasjóð 2025 var 1. október 2024. Sjóðnum bárust 115 umsóknir og sótt var um ríflega 1,6 milljarð króna úr Sviðslistasjóði og launasjóði sviðslistafólks (1.581 mánuður úr launasjóðnum).

Sviðslistaráð úthlutaði 98 m.kr. til 12 atvinnusviðslistahópa og fylgja þeim 102 mánuðir úr launasjóði sviðslistafólks (ígildi 57 milljóna). 98 mánuðum var úthlutað til einstaklinga í úthlutun listamannalauna. Heildarstuðningur til sviðslistahópa og sviðslistafólks í úthlutuninni 2025 var því rúmlega 155 milljónir. Fjölda framúrskarandi verkefna, sem áttu fyllilega skilið að hljóta styrki Sviðslistasjóðs, var hafnað.

Tækniþróunarsjóður bauð upp á sex styrktarflokka á árinu: Styrki til hagnýtra rannsóknarverkefna, einkaleyfisstyrki, Fræ/Þróunarfræ, Sprota, Vöxt og Markað. Sjóðurinn hafði 2.738 m.kr. til umráða samkvæmt fjárlögum en það er lækkun frá fyrra ári þegar fjárheimildin var 3.004 m.kr.

Alls bárust sjóðnum 955 umsóknir í styrktarflokka sjóðsins* og hlaut 141 verkefni styrk eða 15% umsókna. Styrkveiting til nýrra verkefna nam 1.520 m.kr. en þar sem verkefnin eru til allt að þriggja ára nemur heildarkostnaður vegna þeirra 2.749 m.kr.

Sjóðurinn tekur þátt í Eurostars-3 áætlun Evrópusambandsins (European Partnership on Innovative SMEs) fyrir lítil og meðalstór nýsköpunarfyrirtæki. Alls voru 15 styrkt verkefni í vinnslu á árinu, þar af fjögur ný.

*Umsóknir og styrkveitingar í þessari samantekt ná til allra styrktarflokka sjóðsins að einkaleyfisstyrkjum undanskildum.

Markmið styrkja til vinnustaðanáms eða starfsþjálfunar er að hvetja fyrirtæki og stofnanir til þess að taka við nemendum sem stunda vinnustaðanám sem hluta af námi á framhaldsskólastigi og gera þeim kleift að ljúka tilskildu vinnustaðanámi samkvæmt aðalnámskrá framhaldsskóla.

Umsóknarfrestur var 17. nóvember 2025.

Fjöldi umsókna var 200 og af þeim voru 177 metnar gildar. Sótt var um 30.331 viku í heildina. Alls var 18.405 vikum úthlutað. Upphæð til úthlutunar var 386 m.kr. og var henni skipt niður á úthlutaðar vikur. Styrkupphæð hverrar viku var 21.018 kr.

Úthlutun var tilkynnt 2. desember 2025.

Hlutverk Þróunarsjóðs námsgagna er að stuðla að nýsköpun, þróun, gerð og útgáfu námsgagna fyrir leik-, grunn- og framhaldsskóla með það að markmiði að tryggja framboð og fjölbreytileika námsgagna í samræmi við þarfir nemenda og skóla.

Umsóknarfrestur var 17. febrúar 2025.

Alls bárust 94 gildar umsóknir að undangenginni auglýsingu. Sótt var um 216,7 m.kr. Styrkjum að upphæð 89,3 m.kr. var úthlutað til 36 verkefna.

Úthlutun var tilkynnt 3. júní 2025.

Forgangsatriði sjóðsins á árinu voru:

• Námsefni sem styður endurskoðuð greinarsvið aðalnámskrár grunnskóla
• Námsefni sem hvetur til skapandi kennslu
• Námsefni sem gefið er út á fjölbreyttu formi
• Námsefni sem umsækjendur geta rökstutt að mikill skortur sé á
  

Sérstaklega var horft til þess hvort námsefnið styðji grunnþætti menntunar og hversu aðgengilegt námsefnið yrði nemendum. Auk þess er það stefna sjóðsins að námsefni sem fær styrk sé gefið út með rafrænum hætti og gert aðgengilegt á netinu, þegar við á.

Hlutverk sjóðsins er að styrkja verkefni á vegum æskulýðsfélaga og æskulýðssamtaka. Einkum er horft til verkefna sem eru unnin fyrir börn og ungmenn og/eða með virkri þátttöku þeirra, þjálfun forystufólks, leiðbeinenda og sjálfboðaliða, nýjungar og þróunarverkefni og samstarfsverkefni æskulýðsfélaga og æskulýðssamtaka.

Fjárveiting til Æskulýðssjóðs var 9,8 m.kr. á fjárlögum 2025. Það er óbreytt upphæð frá fyrra ári og hefur í raun ekki breyst í rúman áratug. Umsóknarfrestir voru tveir, 17. febrúar og 15. október. Alls bárust 44 umsóknir sem er svipað og undanfarin ár. Upphæðin sem sótt var um var 47,3 milljónir sem er aðeins lægri upphæð en árið 2024. Styrkt voru tíu verkefni að upphæð um 8,8 m.kr. sem er svipuð upphæð og árið áður. Meðalstyrkur var um 880.000 kr. á verkefni sem er aðeins hærra en árið áður.