Miðlun upplýsinga 

Vefur Rannís er grunnstoðin í samskiptamálum stofnunarinnar. Þar er hægt að nálgast upplýsingar um starfsemi Rannís, auglýsingar um umsóknarfresti, úthlutunarfréttir, viðburði, kynningar og einnig allar upplýsingar um sjóði í umsýslu Rannís. Vefurinn var opnaður þann 3. apríl 2014 og hefur að mestu leyti haldist óbreyttur fyrir utan smá útlitsbreytingu árið 2021.

Á árinu 2022 hóf vefstjóri ásamt þverfaglegum hópi starfsmanna Rannís vinnu við kröfulýsingu fyrir vinnslu á nýjum vef. Vinnu við hönnun á nýjum vef verður fram haldið árið 2023.

Á vefsíðu Rannís geta notendur nálgast allar upplýsingar um starfsemi stofnunarinnar og þá þjónustu sem hún veitir. Áhersla er lögð á að leit sé skilvirk og styðji hratt og örugglega við notandann. Hægt er að kalla fram upplýsingar á einfaldan og öruggan hátt um alla sjóði og verkefni í umsýslu Rannís, næstu umsóknarfresti og þá viðburði sem eru á döfinni.

Vefurinn er uppfærður daglega og á forsíðu eru reglulega settar inn nýjar fréttir og upplýsingar um verkefni, sjóði og umsóknarfresti. Vefurinn hentar til skoðunar í öllum tækjum, hvort sem um er að ræða tölvuskjá, spjaldtölvu eða snjallsíma. Hann er því öflug gátt inn í starfsemi stofnunarinnar.

Á enska vef Rannís, er hægt að nálgast helstu upplýsingar um starfsemi stofnunarinnar sem og verkefni og sjóði í umsýslu Rannís á ensku. Vefurinn er ekki bein speglun af íslenska vefnum, heldur er þetta ritstýrð útgáfa sem veitir aðeins lykilupplýsingar á ensku.

Rannís heldur einnig utan um nokkur vefsvæði er tengjast sérverkefnum í umsjón stofnunarinnar. Farabara, er vefur sem veitir upplýsingar um námsmöguleika erlendis. Landskrifstofa Erasmus+ heldur úti sér vefsvæði fyrir Erasmus+ áætlunina, en þar eru veittar upplýsingar um áætlunina og verkefni tengd henni (þ.á.m. European Solidarity Corps). Á vefsvæði Vísindavöku er hægt að nálgast allar upplýsingar sem tengjast Vísindavöku á Íslandi. Rannís heldur utan um Eurodesk síðuna sem veitir ungu fólki upplýsingar um ýmis tækifæri sem þeim bjóðast á erlendri grundu. Ennfremur þjónustar starfsfólk Rannís íslenskan hluta fjölmargra alþjóðlegra vefsvæða er tengjast verkefnum í umsýslu Rannís.

Upplýsingastofan um nám erlendis veitir upplýsingar um nám erlendis og aðstoðar fólk í gegnum síma, tölvupóst og fjarfundi. Upplýsingastofan heldur úti vefnum FaraBara.is sem veitir greinargóðar og ítarlegar upplýsingar um allt sem viðkemur námi erlendis. Árið 2022 var vefurinn heimsóttur 28.912 sinnum sem er aukning frá árinu áður, þegar heimsóknir voru 27.900. Greinilegt er að áhugi á námi erlendis heldur áfram að aukast eftir Covid-19. Á árinu var unnið í nýjum og uppfærðum vef Farabara.is, en vegna tafa í forritun er áætlað að opna nýja vefinn á fyrri hluta árs 2023. Gert er ráð fyrir að nýi vefurinn verði enn aðgengilegri þar sem sérstaklega verður hugað að virkni í snjalltækjum. Upplýsingastofan heldur áfram samstarfi við SÍNE (Samtök íslenskra námsmanna erlendis) og tók einnig þátt í kynningum í menntaskólum og háskólum ásamt Eurodesk og Erasmus+ teyminu. Náðu þessar kynningar til yfir 1000 ungmenna vítt og breitt um landið.

Study in Iceland vefurinn er yfirfarinn af starfsfólki upplýsingastofunnar en það er Íslandsstofa sem heldur vefnum úti. Einstaka sinnum berast fyrirspurnir um nám á Íslandi sem starfsfólk upplýsingastofunnar svarar einnig.

Kynningar í skólum

Framhaldsskóla- og háskólanemar hafa verið aðal markhópur kynningastarfs á tækifærum fyrir ungt fólk á aldrinum 13-30 ára þar sem er að finna ákveðna breidd og fjölbreytileika. Kynningar fóru á flug á árinu og voru þær haldnar ýmist á staðnum eða rafrænar, eftir ósk hvers skóla. Meðal annars var farið í kynningarferð á Vesturland og Fjölbrautaskóli Snæfellinga heimsóttur. Árið 2022 náðu kynningarnar til yfir 1000 ungmenna og fengu þau kynningu á tækifærum í námi, sjálfboðaliðastörfum, ungmennaskiptum og öðru sem stendur ungu fólki til boða í gegnum áætlanir og stoðverkefni Rannís (Erasmus+/ESC). Samfélagsmiðlar hafa verið vel nýttir til að miðla þessum tækifærum og var aukinn kraftur lagður í samfélagsmiðla Erasmus+ og Eurodesk á Íslandi, en það er einmitt starfsfólk Landskrifstofunnar og Eurodesk sem hefur annast þessar kynningar.

Samfélagsmiðlar voru nýttir í auknum mæli til þess að auka sýnileika, koma skilaboðum á framfæri, opna fyrir samskipti og styðja við virkni heimasíðunnar.

Facebook: Rannís heldur úti nokkrum Facebook síðum. Á Rannís síðuna er deilt fréttum af vef Rannís og helstu viðburðum á vegum stofnunarinnar. Einnig halda nokkur verkefni sem eru í umsýslu Rannís úti sér Facebook síðum, t.d. Erasmus+, Nýsköpunarsjóður námsmanna, Tækniþróunarsjóður, Europass, Epale Ísland, Creative Europe Desk á Íslandi, Vísindavaka, eTwinning á Íslandi og Eurodesk Ísland.

LinkedIn: Rannís er með LinkedIn síðu og deilir þar fréttum af vef Rannís og helstu viðburðum á vegum stofnunarinnar. Einnig eru Tækniþróunarsjóður og Enterprise Europe Network með sér síður á LinkedIn.

Twitter: Rannís heldur úti Twitter reikningi þar sem deilt er helstu fréttum og viðburðum. Nokkur verkefni í umsjón Rannís halda einnig úti sér Twitter reikningum, t.d. Erasmus+ menntun, Creative Europe, eTwinning, Nýsköpunarsjóður námsmanna, Vísindavaka, IASC, Tækniþróunarsjóður og Epale Ísland.

Instagram: Rannís er með reikning á Instagram. Þrjú verkefni í umsjón Rannís eru einnig með sér Instagram reikninga; Eurodesk Ísland, Erasmus+ og Vísindavaka.

Rannís heldur úti Youtube rás þar sem birt eru ýmis myndbönd sem tengjast starfseminni. Erasmus+ verkefnið heldur úti sér Youtube rás þar sem kynntir eru þeir möguleikar sem standa til boða í áætluninni og tengdum verkefnum. Einnig má geta þess að fjölmörg myndbönd eru aðgengileg á Facebook reikningum stofnunarinnar sem og á vef.

Rannís lét útbúa kynningarmyndbönd um COST áætlun ESB og þrjú verkefni sem hafa hlotið styrk úr Horizon Europe, auk þess sem gert var myndband um Nýsköpunarsjóð námsmanna í tilefni af 30 ára afmæli sjóðsins á árinu.

Landskrifstofa Erasmus+ og stoðverkefni áætlunarinnar létu útbúa nokkur myndbönd á árinu. Þar á meðal voru fjögur árangursmyndbönd þátttökuaðila á borð við Dalvíkurskóla, Menntaskólann á Tröllaskaga, SEEDS og Fjölmennt. Sum myndbandanna voru hönnuð af grafískum hönnuði og voru ætluð til að vekja athygli á áætlununum og stoðverkefnunum á upplýsandi hátt en önnur styttri myndbönd voru einnig framleidd af starfsfólki Rannís fyrir samfélagsmiðlaauglýsingar.

Dæmi um kynningarmyndbönd:

Rannís

• Kynningarmyndband – COST.
• Horizon Europe - Stoð 2. Íslenska djúpborunarverkefnið.
• Afmælismyndband Nýsköpunarsjóðs námsmanna

Erasmus+

• Árangursmyndband – Dalvíkurskóli.
• Árangursmyndband - Menntaskólinn á Tröllaskaga.
• Árangursmyndband – SEEDS.
• Upplýsingamyndband – Stúdentaskipti.

Starfsemi Rannís var vel sýnileg í fjölmiðlum árið 2022. Alls var fjallað um Rannís í rúmlega 826 fréttum/greinum. Þar af voru 589 á netmiðlum, 229 í prentmiðlum og átta í sjónvarpi/útvarpi. Það sem helst vekur athygli fjölmiðla eru stórar úthlutanir til ákveðinna verkefna, svo sem úr Tækniþróunarsjóði, Rannsóknasjóði, Erasmus+, Barnamenningarsjóði Íslands, Jafnréttissjóði Íslands og til Listamannalauna. Í tengslum við það beinast þá sjónir fjölmiðla að framúrskarandi verkefnum sem unnið hafa styrki úr sjóðum sem heyra undir Rannís. Einnig vöktu athygli veitingar viðurkenninga á borð við Nýsköpunarverðlaun Íslands og Nýsköpunarverðlaun forseta Íslands.