Líflegur vinnustaður

Í árslok 2022 voru starfsmenn Rannís alls 65 í 62,2 stöðugildum að forstöðumanni meðtöldum. Starfsmönnum fjölgaði um tvo frá fyrra ári og stöðugildum um 3,55. Nokkrir starfsmenn voru ráðnir inn vegna aukins umfangs verkefna á rannsókna- og nýsköpunarsviði, greiningar- og hugbúnaðarsviði og skrifstofu forstöðumanns. Alls hættu sjö starfsmenn á árinu, þar af 3 fyrir aldurs sakir, og var ráðið í störf þeirra allra. Hallgrímur Jónasson, forstöðumaður lét einnig af störfum fyrir aldurs sakir 31.03.2022. Ágúst H. Ingþórsson var skipaður forstöðumaður Rannís frá 01.04.2022 til 5 ára. Eitthvað var um breytingar á starfshlutfalli hjá starfsfólki.

Á árinu 2022 urðu breytingar í skipuriti Rannís. Hluti af starfsfólki rekstrarsviðs færðist yfir á skrifstofu forstöðumanns, en þar voru í árslok 4 starfsmenn að forstöðumanni meðtöldum. Á rekstrarsviði fækkaði starfsfólki að sama skapi en þar voru 7 starfsmenn í 6,55 stöðugildum. Á rannsókna- og nýsköpunarsviði voru 23 starfsmenn í 21,9 stöðugildum og var það fjölgun um 3 starfsmenn og jafnmörg stöðugildi, sem tengist auknum umsvifum. Á mennta- og menningarsviði voru 22 starfsmenn í 21,65 stöðugildum. Á greiningar- og hugbúnaðarsviði voru sjö starfsmenn í 6,60 stöðugildum í lok árs og var það fjölgun um einn starfsmann og eitt stöðugildi. Fjöldi starfsfólks á skrifstofu IASC hélst óbreyttur á milli ára eða tveir starfsmenn í 1,75 stöðugildi.

Af 62,2 stöðugildum í árslok 2022 voru sérfræðingar í 53,3 stöðugildum, almennir starfsmenn í þremur stöðugildum, starfsmaður í tímavinnu í 0,60 stöðugildi, aðstoðarmaður í 0,30 stöðugildi, sviðsstjórar í fjórum stöðugildum eins og undanfarin ár og forstöðumaður í einu stöðugildi.

Lífaldur starfsfólks og aldursdreifing

Meðalaldur starfsfólks í árslok 2022 var 48,5 ár. Flest starfsfólk eða 29,2% eru á aldursbilinu 51-60 ára, 26,15% eru á aldrinum 41-50 ára, 20% er á aldrinum 31-40 ára, 20% eru á aldrinum 61 árs og eldri, og 4,6% eru 30 ára og yngri.

Fræðsla innan Rannís

Rannís leggur áherslu á að bjóða starfsfólki sínu fjölbreytta fræðslu með það að markmiði að auka skilvirkni og gæði starfsins, ásamt því að bæta í senn árangur og starfsánægju. Starfsfólk sótti fræðslu og námskeið í tengslum við starfsþróunaráætlun á árinu og í boði voru um 20 fjölbreytt námskeið á vegum stofnunarinnar. Á árinu var einkum lögð áhersla á rafræn námskeið og innanhúsnámskeið. Meðal námskeiða má nefna: lagaumhverfi Rannís, verklag í skjalamálum s.s. skráning og skipulag gagna, viðurkenndir vistunarstaðir, GoPro Foris málaskrá, auk kennslu á Teams, Sharepoint, OneDrive, kerfi í Orranum og aðgangsstýringarkerfið.

Nýliðafræðsla var haldin dagana 13.-16. desember fyrir starfsfólk, sem hafði hafið störf nýlega hjá stofnuninni. Þar var farið yfir lykilatriði í starfsemi stofnunarinnar s.s. hlutverk og stefnur Rannís, starfsmannamál, Vinnustund, verkbókhald, umsóknarkerfi, vefinn, Outlook, GoPro skjalakerfi og Teams. Einnig var haldin nýliðafræðsla eftir þörfum fyrir nýtt starfsfólk í upphafi starfs.

Alls voru haldnir fjórir starfsmannafundir á árinu bæði í rafheimum og raunheimum og fimm fréttafundir. Fréttafundir eru óformlegir morgunverðarfundir, en þar getur hver sem er kvatt sér hljóðs og sagt frá því sem er á döfinni og á erindi til annarra starfsmanna.

Heilsu- og tiltektardagar

Heilsudagar voru haldnir í sumarbyrjun en Rannís leggur áherslu á að skapa góðan vinnustað þar sem starfsfólki líður vel og eru árlegir heilsudagar liður í því. Heilsudagar sameinuðust tiltektardögum að þessu sinni, sem á vel við þar sem ákveðin uppbygging felst í því að taka til og koma hlutunum í rétt horf.

Á heilsudögum hélt Róbert Marshall leiðsögumaður fyrirlesturinn Siturðu inni? Öll von er úti! þar sem hann fjallaði um jafnvægi, valdeflingu og lífsfyllingu í gegnum hreyfingu og útivist. Í tengslum við fyrirlesturinn var boðið upp á göngu um Búrfellsgjá. Eva Einarsdóttir, starfsmaður Rannís og jógakennari leiddi starfsfólk í gegnum endurnærandi heilsujóga og HAFÍS, sjósundfélag starfsfólks Rannís, bauð samstarfsfólki í sjósundtíma í Nauthólsvík. Starfsfólki var einnig boðið að taka þátt í gönguhópi og morgunleikfimi. Til að toppa stemninguna voru töfraðir fram heilsudrykkir á morgnana og einnig var heilsuþema í mötuneytinu í hádeginu. Heilsuvikunni lauk svo með því að starfsfólk gerði sér glaðan dag við Kubbspil á Klambratúni.

Námsleyfi

Alls var varið tæplega 400 klst. í námsleyfi starfsfólks. Einn starfsmaður sótti um og fékk formlegt leyfi til að leggja stund á nám í þrjá mánuði, en kaus að fresta námsleyfinu vegna aðstæðna.

Starfsauglýsingar

Í árslok 2021 var auglýst eftir hugbúnaðarsérfræðingi á greiningar- og hugbúnaðarsviði og sérfræðingi í rannsóknateymi á rannsókna- og nýsköpunarsviði sem hófu störf í byrjun árs 2022. Í upphafi árs var einnig auglýst eftir sérfræðingi á mennta- og menningarsviði til að hafa umsjón með norrænu menntastarfi og tveimur sérfræðingum í alþjóða- og nýsköpunarteymi rannsókna- og nýsköpunarsviðs. Þetta starfsfólk hóf störf á vormánuðum. Ráðinn var einn sumarstarfsmaður í skjalamál á rekstrarsviði en viðkomandi hefur auk þess verið í hlutastarfi með námi. Starf sviðsstjóra rannsókna- og nýsköpunarsviðs var auglýst í apríl. Rannís fékk ráðgjafafyrirtækið Vinnvinn sér til ráðgjafar við ráðningarferlið. Gengið var frá ráðningu í júnílok eftir ítarlegt ferli og hóf nýr sviðsstjóri formlega störf um haustið. Á haustmánuðum var einnig ráðinn nýr kynningarfulltrúi Rannís á skrifstofu forstöðumanns, bætt var við sérfræðingi í æskulýðsteymi mennta- og menningarsviðs, einnig sérfræðingi í nýsköpunarteymi rannsókna- og nýsköpunarsviðs og hugbúnaðarsérfræðingi á greiningar- og hugbúnaðarsvið. Í árslok var auglýst eftir sérfræðingi í alþjóðateymi annarsvegar og hinsvegar sérfræðingi í nýsköpunarteymi rannsókna- og nýsköpunarsviðs. Þetta starfsfólk hefur störf á fyrri hluta árs 2023.

Á árslok 2021 auglýsti mennta- og menningarmálaráðuneytið embætti forstöðumanns Rannís – Rannsóknamiðstöðvar Íslands laust til umsóknar. Þann 1. apríl 2022 var Ágúst H. Ingþórsson skipaður forstöðumaður til fimm ára.

Starfsfólk Rannís hjá IASC

•  Gerlis Fugmann 
• Kolbrún Reynisdóttir 
• Frederica Scarpa, samkvæmt samkomulagi við Norðurslóðanet .

Breytingaferli Rannís 2013-2022